• Feb. 16, 2023

Süd vəzi xərçəngi müayinəsi

Demək olar ki, hər dəfə süd vəzi xərçəngindən qorunmaq və zamanlı müalicə üçün həkim müayinələrinin vacibliyini qeyd edirik. Erkən diaqnozun əhəmiyyətini, müəyyən yaş dövrünü keçən qadınlarda vaxtlı-vaxtında evdə müayinəni (öz-özünü müayinə), ildə 1-2 dəfə isə həkim qəbulunda müayinəni diqqətdən kənar saxlamaq olmaz.

İndi isə süd vəzi xərçənginin müayinə üsullarından biri ilə tanış olaq.

Süd vəzi xərçənginin müayinə üsulları

Nəzərdə saxlamaq lazımdır ki, 30-35 yaşa qədər evdə əllə müayinə olunmaq vacib olsa da, bu yaş dövrünü keçdikdən sonra həkim qəbulunda olmaq zəruri hesab olunur. Çünki bu zamandan sonra daha professional müayinə üsullarına ehtiyac yaranır. Son dövrlərdə nisbətən gənc qadınlarda da bu xəstəliyin geniş yayılması müayinə yaşının da gəncləşməsinə, hər qadının öz sağlamlığına diqqətli yanaşmasına bir çağırışdır.

USM ən təhlükəsiz müayinə üsulu hesab olunur

Bu müayinə metodunda ultrasəs dalğalarından istifadə olunaraq süd vəzilərinin daxili strukturu barədə məlumat alınır. Müayinə tam zərərsiz, qeyri-invaziv və maddi baxımdan ucuz başa gəldiyi üçün çox vacib yer tutur. USM 35 yaşa qədər bütün xanımlarda ilk müayinə, 35+ qadınlarda isə mammoqrafiya ilə paralel aparılmalıdır. USM zamanı orqanda rast gəlinən şübhəli törəmənin damarlanmasına və sərtlik əmsalına da diqqət etmək mümkün olur. Bu cəhət digər müayinə üsullarında yoxdur. Qeyd edirik ki, USM birbaşa həkimdən, yəni operatordan asılı olan radioloji üsuldur. Yoxlanış və şəklin verilməsinə birbaşa həkim cavabdehlik daşıyır.

Süd vəzilərinin ultrasəs müayinəsinin ümumi xüsusiyyətləri aşağıdakılardır:

Tərkibində radiasiya yoxdur. Bu üsula üstünlük verənlər radiasiyadan narahat olmadan müayinə edilə bilir. Bu üsulun xüsusilə hamilə qadınlar tərəfindən həkim göstərişi ilə seçilməsi tövsiyə olunur.

Süd vəzinin quruluşu daha vizuallaşdırılır -  Süd vəzi toxumasına ultrasəs üsulu ilə baxan mütəxəssislər bu müayinədən daha aydın və dəqiq nəticələr toplayırlar. Süd vəzidəki toxumanın maye və ya bərk olması ilə bağlı məlumatların müəyyən hissəsinə çatmaq olar. Süd vəzidəkidəki kistin xoş və ya bədxassəli olması ilə bağlı biopsiya aparılacaqsa, bu da ultrasəs nəzarəti altında aparılır.

Kist təqibi aparıla bilər - Süd vəzi toxumasındakı kistlər həmişə bədxassəli olmaya bilər. Bu üsul müntəzəm müayinə ilə kistləri idarə etmək üçün istifadə edilə bilər.

Erkən diaqnozu asanlaşdırır - Süd vəzinin ultrasəs müayinəsi sıx süd vəzi toxumasının təsvirini təmin edir. Toxumalar aydın şəkildə göstərilə bilər. Mütəxəssislər sıx döş toxuması olan insanlar üçün mamoqrafiyadan əlavə USG-ni də tövsiyə edirlər.

Xəstənin narahat olmasına ehtiyac yoxdur. Süd vəzi xərçəngi müayinələrinin bəziləri xəstələri psixoloji olaraq qorxuda bilər və stress yaşamasına səbəb ola bilər. Süd vəzi ultrasəs müayinəsi zamanı ani görüntüləmə olduğu üçün mütəxəssislər dərhal görüntüləmə aparıb vəziyyəti xəstələrə çatdıra bilərlər.

Süd vəzi xəstəliyindən qorunmaq üçün unutmamalı olduğunuz ən vacib məqam: "Erkən diaqnoz həyat qurtarır."